Një sasi kanabisi i mbjellë në fshatrat e Lezhës e Mirditës është asgjësuar nga policia e zonës. ‘Blutë’ sekuestruan 2918 bimë kanabis të mbjella në fshatrat Kashnjet dhe Zall Xhuxhë. Operacioni i policisë ‘Imazhi’ mundëson kapjen e drogës dhe kontrollit me dronë në zonat e pyllëzuara. Ende nuk dihet se kush kanë qenë kultivuesit.
Si rezultat, u finalizua faza e 27-të e operacionit policor antikanabis, në nivel qarku, të koduar “Imazhi”, si rezultat i së cilës, në fshatin Kashnjet të njësisë administrative Ungrej, rrethi Lezhë, janë gjetur të kultivuara në tokë në zonë të shpyllëzuar 2400 bimë, si dhe në fshatin Zall Xhuxhë të njësisë administrative Fan, rrethi Mirditë, janë gjetur edhe 518 bimë të tjera të dyshuara narkotike cannabis sativa të kultivuara në tokë në zonë të shpyllëzuar.
Bimët narkotike, pas kryerjes së veprimeve procedurale, u asgjësuan nëpërmjet djegies.
Policia e Lezhës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Lezhë, vijon veprimet hetimore, me qëllim identifikimin dhe arrestimin e autorit/ëve të kësaj veprimtarie kriminale.
Materialet procedurale i kaluan Prokurorisë, për veprime të mëtejshme.